Slaaptyd stories deur Arthur S. Maxwell

Verloor en gevind

'n Mens hoor nie dikwels van geld wat in die straat opgetel en aan die eienaar terug besorg word nie, maar hier is 'n ware verhaal van hoe 'n seun twee halfkrone teruggekry het toe hy die Here om hulp aangeroep het. 

Hennie het sy somervakansie in sy geboortedorpie deurgebring en toe die tyd aanbreek dat hy weer na die kosskool moes teruggaan, het sy Vader hom twee halfkrone as afskeidsgeskenk gegee.

Baie bly oor die baie geld wat hy het, het Hennie stasie toe gegaan om die trein terug skool toe te haal. Hy het sy tas op die rak gesit en aangesien daar niemand in die kompartement was nie, het hy by die venster gaan sit, sy geliefkoosde plek, en uitkyk.

Kort nadat die trein vertrek het, het hy gedink hy sal darem weer bietjie na sy geld wat sy pa hom gegee het, kyk. Hy het nog nooit voorheen soveel skatte besit nie, en hy wou graag die geld sien en dit tussen sy vingers voel.

Hy het in sy broeksak gevoel waar hy gemeen het hy die geld gesit het, maar dit was nie daar nie. 'n Vreeslike angs het hom beetgepak. Koorsagtig het hy in sy ander sakke gesoek, maar kry was min. Die twee halfkrone was weg!

Maar waar? Hoe? arme Hennie kon sommer huil so sleg het hy gevoel. Het iemand dit gesteel? Dit was onmoontlik. Hy het niemand behalwe die kruier ontmoet nie en hy was 'n eerlike man.

Vir die derde keer het hy al sy sakke deurgesoek en eindelik vind hy die oorsaak van sy verlies. Daar, in die hoek van sy regterbroeksak, was die gat waar sy geld deurgeval het.

"Weg!" het arme Hennie uitgroep, en hy kyk na die skeur in sy sak. "En wie weet waar? Enige plek van die huis af tot by die stasie. Dit kon in die sand geval het of iemand kon dit opgetel het. Ek wonder wat sal Pa sê?"

Terwyl hy gesit en treur het oor sy verlies, het 'n gedagte by hom opgekom. "Die Here weet waar daardie geld is, en as dit Sy wil is, kan Hy dit aan my terugstuur. Ek gaan Hom nou vra om dit te doen."

Daar waar hy alleen in die kompartement was, het Hennie gekniel en gebid, en dit is die woorde wat hy gesê het: ""Liewe Heer, laat iemand asseblief die geld wat ek verloor het, vind en dit vir my aanstuur."

Drie dae het verbygegaan. Hennie was terug op kosskool, en aangesien hy baie besig was, het hy begin vergeet van die geld. Maar die Here het nie sy gebed vergeet nie. 

Een more het hy 'n brief ontvang. Dit was van sy broer Karel. Toe Hennie dit oopmaak, sien hy 'n posorder vir vyf sjielings en hier is die verbasende verhaal wat hy in die brief gelees het: 

Karel het self een halfkroon nie ver van die huis af nie, in die straat opgetel. n Myl verder het 'n klein dogtertjie die ander halfkroon opgetel en dit na Karel gebring en hom gevra of hy nie weet aan wie dit behoort nie. Is dit engisins snaaks dat Hennie daardie dag bly was? Sedertdien het hy nooit daaraan getwyfel dat die Here van die hemel gewillig is om na selfs die eenvoudigste gebede van Sy gelowige kinders te luister nie.