Slaaptyd stories deur Arthur S. Maxwell

Gert se Sjieling

Dit is sommer 'n eenvoudige storietjie, maar dit is baie mooi. Ek is seker dat julle daarvan sal hou. Dit het werklik gebeur.

Gert was maar agt jaar oud. Sy ouers was baie arm en hulle kon hom nooit eintlik veel sakgeld gee nie - net so nou en dan 'n pennie.

Eendag het iemand hom 'n hele sjieling gegee! Meneer Rockefeller met al sy miljoene het nie so ryk gevoel nie.

Gert was so in sy skik met die sjieling, dat hy dit gedurig uit sy sak gehaal het om daarna te kyk. Hoe blink en mooi was dit nie! En wat sou hy nie alles daarmee kan koop nie!

Maar later, toe Gert vir die soveelste keer weer sy hand in sy sak steek om sy sjieling uit te haal, was dit skoonveld! Hy het sy sakke omgekeer, maar wat weg is, was sy sjieling. Hy het die huis koorsagtig deursoek en in die tuin en orals waar hy kon geloop het, maar sy sjieling kry was min. Hy was baie hartseer. Om te dink dat sy kosbare sjieling waarvoor hy nog niks gekoop het nie, weg was! Dit was darem te vreeslik.

Dit het aand geword en baie omgekrap het hy gaan slaap. Toe hy in die bed was, het hy onthou dat hy nie gebid het nie.

"Wel," het hy gedink, "waarom moet ek nog bid. My sjieling is weg en wat sal verdere biddery nou help. As God my nie wil wys waar my sjieling is nie, sal ek ook nie tot Hom bid nie. Ek sal sommer net so gaan slaap."

Maar hy kon nie slaap nie. Kort-kort het 'n stemmetjie binne-in hom vir hom gesê: "Gert, jy het nog nie gebid nie."

Dan het hy maar weer omgedraai en probeer om te slaap, maar wat wou. Gert het rondgerol en rondgerol, maar slaap kon hy nie en daardie stemmetjie wou hom maar nie met rus laat nie. "Gert, jy het nog nie gebid nie." Eindelik het hy regop in die bed gesit.

"Miskien moet ek maar bid," het hy vir homself gesê. Toe het hy van die bed afgeklim en gekniel.

"O, wat is dit!" het hy uitgeroep, want sy knie het op iets klein en koud en hard te lande gekom: Dit was sy sjieling!