Slaaptyd stories deur Arthur S. Maxwell

Die Verkeerde Sleutel

Henry het al kwater en kwater geword. Op die tafel voor hom was 'n klein swart kissie wat sy Vader hom gegee het, en waarin hy sy kosbaarhede toe gesluit het sodat sy broertjie hulle nie kan bykom nie. Die kissie was gesluit, en Henry het geprobeer om dit oop te sluit.

Die sleutel wou eenvoudig nie in die slot draai nie.

Hoe hy ookal geprobeer het, kon hy dit nie oop sluit nie.

Hy het die sleutel ingesteek en dan weer uitgetrek, hy het dit so gedraai, en dan weer so, maar die kissie oopkry was min.

Hy het met sy vuis op die kissie geslaan, hy het dit geskud, en dan weer onderstebo gehou, maar niks wou gebeur nie.

En hy was so haastig. Hy het belowe om een van sy vriende in die dorp te ontmoet, maar die posseëls wat hy hom wou wys, was in die kissie teogesluit. Maar waarom wil die kissie dan nie oopgaan nie? Toe het Moeder ingekom en gevra wat skeel.

"Dis hierdie kissie," het Henry kortaf gesê. "Ek kan dit nie oopkry nie."

"Laat my probeer," het Moeder gesê.

"Dit sal nie help nie," het Henry gesê. "Ek het al oor en oor geprobeer."

"Miskien het jy die verkeerde sleutel," het Moeder gesê.

"Nee, ek het nie," het Henry ongeduldig gebrom; ek ken tog seker die sleutel van my kissie."

"Jy behoort dit te ken," het Moeder gesê, "maar alle mense vergis hulle soms."

"Wel, ek het nie," het Henry dadelik gesê. "en tog wil dit glad nie oopsluit nie!"

Moeder het haar ontrrek.

Weer het Henry die sleutel begin draai. Eindelik het hy woedend 'n tang gegryp en die sleutel 'n geweldgie draai gegee.

Natuurlik het hy die sleutel morsaf in die slot gedraai. "Nou het hy dit! Nou sal ek dit glad nie kan oopkry nie," het hy huilend gesê.

"Skielik het hy die hamer daar sien lê.

"Nou sal ek hom oopmaak," het hy gesê, "kom wat wil."

Hy het die kissie met die hamer begin slaan dat dit so dreun.

"Oop is hy", het hy geluister, toe hy die slot heeltemal stukkend geslaan het. "Wat het jy nou gedoen?", het Moeder gesê, "en jy sal dit nooit weer kan toemaak nie. Hy het dit so gebreek dat dit nie reggemaak kan word nie. En daardie kissie het R2 gekos."

"Het dit?" het Henry verbaas gevra.

"Natuurlik het dit," het Moeder gesê, "en jy sal mooitjies 'n nuwe een moet koop."

Nou was Henry baie spyt oor wat hy gedoen het. "En wat lê hier op die vloer?", het Moeder gevra terwyl sy buk en iets optel. "Wat is hierdie?"

"Dit is my kissie se regte sleutel," het Henry baie skaam gesê. "Ek het al die tyd met die verkeerde sleutel gesukkel. Waarom het ek dit tog nie agtergekom nie? Dan sou my kissie nie nou heeltemal stukkend gewees het nie."

"Weet jy," het Moeder saggies gesê, "dit is nooit goed as 'n mens ongeduldig word nie. 'n Mens begaan altyd foute wanneer jy kwaad word."

Henry het niks gesê nie, maar onderweg na sy vriend het hy baie ernstig nagedink. Hy sal nie gou weer so 'n dwase ding doen nie.