Afrikaanse spreekwoorde en idiome

Canossa

...Na Canossa gaan. Jou aan iemand onderwerp. Go to Canossa. Go on hands and knees. Canossa is 'n dorp in Noord-Italië. In Januarie 1077 het die heilige Roomse keiser Hendrik IV  van Duitsland na Canossa gereis om 'n oudiënsie aan te vra met pous Gegorius VII, wat in 'n kasteel aldaar gebly het. Keiser Hendrik is vroeër deur die pous uit die kerk geban en hy wou vergifnis kom vra. 

Hy het drie dae lank sonder hoed of skoene in die binnehof van die kasteel gestaan, en hierdie nederigheid het die pous oorreed om hom te vergewe. Die uitdrukking na Canossa gaan word toegeskryf aan die Pruisiese  staatsman prins Otto von Bismarck gedurende sy vete met die katolieke Kerk in die 19de eeu.

'n Idioom is 'n vaste spreekwoord of segswyse wat eie is aan 'n spesifieke taal, streek of volksgroep. Idiome het gewoonlik 'n dieper betekenis wat uit die tradisies, geskiedenis en leefwyse van 'n volk gegroei het. Dit is nie altyd moontlik om die betekenis van 'n idioom uit die woorde af te lei nie, omdat dit baie op figuurlike spraak berus. Vir die rede kan idiome ook nie direk van een taal in 'n ander vertaal word sonder om die betekenis daarvan in ag te neem nie.

'n Spreekwoord is 'n kort, kernagtige gesegde, waarin 'n algemene waarheid of wyse les uitgedruk is.