Wys my die Plek - C. Louis Leipoldt

Posted by Paul Joubert on Thursday, August 22, 2013 Under: Afrikaans: Gedigte

Wys my die plek waar ons saam gestaan het, 

Eens, toe jy myne was -

Vroeër, voor jou liefde vir my getaan het,

Vroeër, toe jy myne was.

Kyk, dis dieselfde; die silwer see

Blink in die sonskyn, soos lang verlee

Dit eenmaal geblink het, 'n welkomsgroet

Vir ons liefde wat uithou as alles vergoed.

Wys my die plek waar ons saam gekniel het,

eens, toe jy myne was -

Vroeër, toe een siel vir ons saam besiel het,

Vroeër, toe jy myne was.

Kyk, dis dieselfde; die hemel, blou,

Lag soos voorheen op my en op jou;

Dit skitter nog altyd 'n welkomsgroet

Vir ons liefde wat uithou en alles vergoed.

Wys my die plek waar ons saam geloop het,

Eens, toe jy myne was -

Vroeër, toe ons harte so veel gehoop het,

Vroeër, toe jy myne was.

Kyk dis dieselfde! Net jy nie. vra,

Wie van ons twee moet die meeste dra?

Jy wat vergeet het - of ek wat boet

Vir my liefde wat uithou en alles vergoed?

C. Louis Leipoldt

In : Afrikaans: Gedigte 


Tags: wys my die plek  c. louis leipoldt  afrikaanse gedigte 
www.myvolk.co.za Logo

Make a free website with Yola