# Afrikanerhart - die Trekpad van 'n Nasie

Die Slegte Beer

Etlike weke gelede het ek iets baie snaaks gesien in die Yosemite-park - daardie welbekende natuurwonder van Kalifornië.

Persoonlik hou ek nie van die bere nie. Ek meen dat hulle afgekamp behoort te wees en nie moet losloop in die openbare parke nie. Dit is nie eintlik aangenaam om 'n groot, vet beer in die pad teë te kom nie, of om een te hoor krap aan jou tent as jy miskien uitkamp nie.

Maar die bere is daar. Die mense sê dat hulle niemand sal aanval nie, maar ek het al gesien hoe mans - sterk mans - weghardloop wanneer 'n beer skielik na hulle toe aangestap kom.  Eendag het ons gestaan en kyk na die bere - julle kan daardie einste beer in die prent sien - toe iemand skreeu: "Kyk, hy gaan in die motor klim."

Almal was natuurlik opgewonde, en hulle het daarheen gehardloop om te sien wat gaan gebeur. Dit wil voorkom asof Meneer Beer vir 'n hele tyd al die gewoonte gehad het om motors te besoek en alles te verwyder wat na voedsel lyk - hy het gewoonlik die stoffeerwerk van die motor oopgeskeur in sy soektog. En hy wou nou weer dieselfde doen. Hy het sy groot kop by die venster probeer insteek, terwyl die mense gestaan en giggel het. Vir een vrou was dit baie snaaks; sy het hard gelag, en haar vriende geroep om te kom kyk.

Toe het iets gebeur wat ek nooit sal vergeet nie. Skielik het iemand geskreeu: "Kyk, die beer was in daardie blou motor. Hy het die agterste kussing heeltemal stukkend geskeur, en hy het 'n hele doos sjokolade verslind, met doos en al."

Almal het omgekyk. Toe was daar 'n gil van die vrou wat 'n rukkie tevore so lekker gelag het. "Dis my motor!" het sy ontsteld uitgeroep. Dit was haar motor; die stoffeerwerk was lelik verskeur, en haar doos sjokolade het verdwyn. Dit was ongelukkig vir haar, maar in 'n sin was dit 'n soort van vergelding, want sy het skynbaar nie omgegee solank dit iemand anders se motor was wat beskadig is nie. 

Die voorval het my laat dink aan 'n teks in Spreuke, wat lui: "Hy wat bly is oor 'n ongeluk, sal nie ongestraf bly nie." Spreuke 17:5.

Daardie tetks was in hierdie geval bewaarheid. Ons behoort altyd baie versigtig te wees, wanneer ander dit ongelukkig tref, om nie hulle las swaarder te maak nie, want ons kan nooit weet hoe gou dieselfde ongeluk ons mag tref nie.  Ek het al gevalle gesien waar dit baie gou gekom het.

Ek onthou dat ek eenmaal gelag het vir 'n vriend omdat sy motor teen 'n steilte gaan staan het; maar dit was nie lank nie, of ek was in dieselfde verknorsing, en daardie vriend was daar om dit te sien! Hy kon toe gesê het: "Goed So!" maar hy het nie. Dit was baie vriendelik van hom, was dit nie?

Ek hoop dat julle ook so sal handel, en dat julle, wanneer 'n vriend, of 'n vyand, se fiets 'n lek kry, of as hy 'n albaster verloor, of iets anders wat vir hom waardevol is, nie vir hom sal lag nie, maar hom sal help. As julle dan eendag in die verknorsing kom, mag daar miskien iemand wees wat julle sal help en met julle sal simpatiseer.
 
Slaaptyd stories

Deel Vier

deur Arthur S. Maxwell