Alles kom van Bo

(Vind die Audio Weergawe onderaan die blad)


Slaaptyd stories
Deel EEN

deur Arthur S. Maxwell

Oom Attie se Slaaptydstories

In 'n nederige huisie in Frankryk het 'n arm, maar godvresende man op sterwe gelê. Hy het sy enigste seun na hom toe geroep en gesê "My liewe klein Pierre, jy sal netnou alleen op die aarde wees en baie moeilikhede sal jou oorval, maar onthou altyd dat alles van bo kkom, dan sal jy dit makliker vind om alles geduldig te verdra."

Kort na hierdie woorde het die man gesterf en arme Pierre was alleen in die wêreld. Al wat hy kon doen om aan die lewe te bly, was om te bedel.

Terwyl hy van deur tot deur in die dorpies gegaan het, het hy vir die mense gesing en gewoontlik net genoeg ontvang om nie van honger om te kom nie. Elke keer wanneer iemand vir hom geld of kos gegee het, het hy - gedagtig aan sy vader se laaste woorde - gesê "dit kom van bo".

Dit het 'n gewoonte by h m geword om hierdie woorde gesê, wat ook al met hom gebeur het en hy het gevind dat hulle hom regtig gehelp het om alles met geduld te dra.

Eendag, terwyl hy deur 'n dorpie geloop het, het 'n skielilke windvlaag 'n dakpan van 'n huis afgeruk. Dit het Pierre mooi teen die skouer getref en hom teen die grond geslaan.

"Dit kom van bo," was sy eerste woorde toe hy weer opstaan. Soos 'n mens kan verwag, het die mense hartlik uitgebars van die lag.

'n Minuute later het nog 'n rukwind egter die hele dak van 'n huis afgewaai 'n entjie verder af. As Pierre aangeloop het, was hy miskien dood. Dus het hy by homself gedink dat die dakpan wat hom getref het, in meer as een sin "van bo" gekom het.

By 'n ander geleentheid is klein Pierre deur 'n ryk man gehuur om 'n belangrike brief by 'n sakeman in 'n naburige dorpie te gaan aflewer. Aan hom is gesê om gou te maak, dus het hy so vinnig as wat hy kon, gehardloop. By 'n stroom gekom, het hy probeer oorspring, maar, helaas, hy het in die water beland en amper verdrink. Toe hy eindelik die wal uitklouter, nat en moeg, het hy gevind dat die kosbare brief weg was. Hy het oral rondgesoek, maar kon dit nêrens kry nie. "Dit kom van bo," het hy vir homself gesê, terwyl hy bedroef teruggaan na die ryk man se huis.

Natuurlik was die ryk man baie kwaad vir hom. So kwaad dat hy hom met 'n sweep uit die huis gejaag het. Maar al wat Pierre kon sê, was "dit kom van bo".

Die volgende dag het die ryk man hom egter laat roep. "Ek is baie bly dat jy gister in die water geval het," het hy gesê. "Dinge het sedert gister verander. As jy daardie brief afgelewer het, sou ek ernstige skade gely het. Ontvang asseblief hierdie geskenkie as blyk van my dankbaarheid." En die ryk man het meer geld in sy hande geplaas as wat hy vir 'n baie lang tyd gesien het.

"Dit kom van bo," het hy gesê terwyl hy glilmlaggend die huis verlaat.

So het Pierre groot geword en altyd geglo dat die hand van die Here hom lei. Vir diegene wat die Here liefhet, werk alles ten goede mee, het hy in die Bybel gelees. Later het hy ook - danksy die Here - 'n welgestelde sakeman geword.

Gelukkig is die seuns en dogters wat so 'n vertroue in hul hemelse Vader het. Dit sal hulle baie onnodige hartseer en moedeloosheid spaar en hul harte vul met 'n stil vertroue wat niks kan versteun nie. Probeer bietjie en kyk hoe dit werk!